Þá eru tvö próf af þremur búin, bara erfðafræði eftir. Hef tvo daga til að bæta fyrir vanrækslu á því fagi. Mér er ekki búið að ganga eins vel og ég hefði viljað. Það fékk mig til að hugsa um hvað ég er búin að koma mér út í hérna í Danaveldi. Afrakstur þessara hugasana kemur hér sem yfirlit yfir árið 2007 í lífi mínu (sorrí að þetta blogg sé allt um sjálfa mig, þarf bara að losa mig við þetta).

Í Janúar fór ég í rústúr með öðrum komandi læknisfræðinemum og byrjaði svo í sjálfu náminu í febrúar. Þar með kynntist ég ýmsu áhugaverðu fólki, en best samt vinkonum mínum Anette, Vilmu og Caroline. Ég reikna með að þær verði vinkonur mínar í langan tíma, enda verðum við sennilega samferða í gegnum allt þetta langa nám.

Fyrsta önnin gekk bara ágætlega, fékk yfirlit yfir helstu kerfin í líkamanum og efnafræðikennslu. Lærði um samskipti sjúklinga og lækna, þótt það væri dálítið erfitt að setja sig í hlutverk lækna svona stutt á veg kominn í náminu. En ég stóðst prófin.

Sumarið var klassískt íslenskt, vinna á Álfalandi, vinir, fjölskylda, fótbolti. Spilaði svo 15 mínútur í dönsku úrvalsdeildinni með A-liðinu í klúbbnum mínum þegar ég kom aftur út. Skemmtileg reynsla, töpuðum samt 6-0...

Þessi önn í skólanum hefur verið talsvert mikið erfiðari en sú fyrsta. Ég tók námskeið til að verða sygeplejevikar, það gekk vel og nú er ég búin að vinna nokkrar vaktir inn á spítölunum sem hefur verið áhugavert.

Námskeiðið truflaði námið talsvert og gerði lífið dálítið efitt á tímabili. Síðustu tvo mánuði hef ég samt lært mikið, verið mikið með Kela, Röggu, Steina, Dóra og Védísi í lærdómi á CBS bókasafninu, skemmtilegt svona félagslegur lærdómur. Fannst ég vera orðin frekar góð í þessu dóti (lífeðlisfræði, frumulíffræði og vefjafræði), en náði ekki að skila því vel frá mér í prófinu í gær.

Talaði við Anette vinkonu mína áðan um hvað við erum búnar að koma okkur út í , gat maður ekki valið eitthvað nám sem maður hefði brillerað í, fengið meira út úr? Þar sem maður uppsker fyrir lærdóminn. En við vorum samt sammála því að vinnan á spítölunum, með sjúklinga, hún gefur manni eitthvað, hefur áhrif á mann og breytir manni jafnvel (alla vega meira en að læra frumuferla utanað). Þannig að kannski er púlið þess virði þegar það skilar manni inn á spítalana með kunnáttu sem getur hjálpað.

Já, það eru plúsar og mínusar við þetta ár. Ætti kannski að bæta við þeim plús að ég var einn af stofnendum Ölfélagsins Jónasar, sem er félag sem á framtíðina fyrir sér. Svo varð ég enn á ný föðursystir með fæðingu Agnesar Matthildar nú í desember.

Annars vil ég óska öllum gleðilegra jóla og ég hlakka til að sjá ykkur heima (ég kem 21., Keli kemur í dag).

Sigrún

Jæja, þá er komið að mér að blogga á Det Konglige Bibliotek. Ég er hér að skrifa u.þ.b. það leiðinlegasta (og lélegasta) verkefni sem ég hef skilað af mér. En nei, Sigrún er ekki búin að missa allan námslegan metnað, þetta er fyrir námskeiðið sem ég er á, til að verða afleysingasjúkraliði (en samt lægra sett en sjúkraliði tæknilega séð). Ég vann tvær vaktir á spítalanum í Glostrup í síðustu viku og á nú að skrifa um hvernig ég þvoði fólki, mældi blóðþrýsting og púls, skipti um bleyjur og gaf að borða, í samræmi við þarfir sjúklinganna. Þetta er alveg áhugavert, en bara ekki ritgerðarefni finnst mér. Svo er ég líka frekar hæg í að skrifa á dönsku (nema efnafræðiskýrslur, það er ég farin að mastera).

En þetta er samt búinn að vera frekar góður dagur, var í smá panikki í morgun þegar ég fann ekki bæklinginn með undirskriftum sem votta að ég hafi mætt á námskeiðið mitt og sá fram á að ég þyrfti að taka allt draslið aftur. Eftir að ég var búin að snúa öllu á hvolf í íbúðinni (sorrí Keli) fór ég upp í skóla og fann bæklinginn bakvið ofn á skólabarnum, þar sem var sturtað úr töskunni minni á síðasta föstudag á 69 tíma bar. En þetta reddaðist sem sagt og ég gat andað léttar.

Eftir þetta fórum við í bekknum í krossapróf í erfðafræði og viti menn, ég var best í bekknum með 98% rétt :) Ég er sennilega ekki álitin sú klárasta í bekknum (enda segi ég aldrei neitt í tímum), en þarna náði ég að sýna að ég er nú með eitthvað þarna uppi. Þetta próf gildir nú samt ekki neitt, en alvöru prófin nálgast óþægilega hratt...

Um síðustu helgi fór ég til Svíþjóðar, ekki til Malmö að þessu sinni heldur til Linköping þar sem Hjördís og Tryggve búa og Helga var í heimsókn. Við höfðum það mjög gott, fórum á stúdentadjammið, versluðum, fórum í göngutúr í skóginum og versluðum svo aðeins meira þar sem Linköping býður ekki upp á neitt rosalega mikið annað að gera... Hjördís og Tryggve búa í risaíbúð (og borga jafn mikið í leigu og við) og við hliðina á húsinu þeirra er skógur og í göngufjarlægð er háskólasvæðið, þannig að þetta er nú bara alveg fullkomið. Ég þakka krökkunum fyrir góða helgi og til hamingju með afmælið í gær Helga!

Þetta er allt og sumt í kvöld. Ég ætla að leggja lokahönd á (lélega) verkefnið mitt og fara svo heim að borða. Sigrún

Sit hérna í gamla lestrarsalnum í det kongelige bibliotek (svarta demantinum). Frekar fyndinn salur, er í laginu eins og kirkja með risasúlum og mjög hátt til lofts. Ekki sniðug hönnun á lestrarherbergi vegna þess að það bergmálar óþægilega mikið. Áðan missti ég blýantinn minn á gólfið "BAMM", allir í salnum litu á mig eins og fífl. Þá er nýi salurinn betri, en maður þarf að mæta klukkan níu til að fá sæti þar.

Annars er þetta að frétta:

-FC RUT, fótboltaliðið mitt, sigraði sína deild með yfirburðum í ár, við erum komnir upp í A-deild Kaupmannarhafnarsvæðisins (Ekki spyrja mig hvað það þýðir)
-Ég fékk flest gul spjöld í ár, en maður þarf að borga sekt fyrir hvert spjald. Ég náði að semja um magnafslátt
-Erik, danskur strákur úr FC RUT, játaði fyrir mér síðasta föstudag að hann væri sjúkur Haukur Mortens aðdáendi! Ekki nóg með það heldur söng hann fyrir mig "Borg mín borg" lagið. Mjög fyndið.
-Dóri hrundi af hjólinu sínu á föstudaginn, líka mjög fyndið
-Ég er líklega búinn að finna stað og leiðbeinanda fyrir mastersverkefnið
-Sigrún er á námskeiði til 9-10 öll kvöld þessa dagana, mér líður dálítið eins og ég búi einn, en námskeiðið er næstum búið :)
-Það stendur Ragnhildur Erna á skrúfblýantinum sem ég held á
-Mamma og pabbi eru að sóla sig á Spáni og Portúgal
-Ég hljóp 10 km í gær á hlaupabrettinu í ræktinni
-Við fórum út að borða í hádeginu í gær á stað sem heitir FIAT með Helga og Pernille. Helgi átti afmæli á mánudaginn, til hamingju Helgi.

Jæja, verið að hóa í mig, er að fara í hádegismat. Heyrumst síðar.

Keli

Bekkjarsystir mín sagði okkur í dag frá hjúkrunarkonu sem hún var að vinna með fyrir FADL. Hjúkrunarkonan hafði lært læknisfræði í 5 annir en svo farið yfir í hjúkrunarfræði. En ömurlegt skref niður, sagði bekkjarsystir mín og hló, að vera í læknisfræði og enda svo bara sem hjúkka.

Ef ég verð einhvern tímann svona hrokafullur læknanemi eða læknir, megið þið slá mig. Ég þoli ekki þegar læknanemar halda að læknisfræði sé það sem allir vilja gera, en endi svo kannski bara í öðru af því að þeir komast ekki inn. Hvað með smá virðingu fyrir fólkinu sem við komum til með að vinna með í framtíðinni? Það eru til önnur áhugaverð og mikilvæg fög önnur en medicin.

Jæja, varð bara að koma þessu frá mér, er annars að lesa í The Cell, besta vini mínum þessa stundina. Er svo á námskeiði á kvöldin, SPV-kúrs fyrir læknanema, til að fá vinnu sem "sjúkraliðaafleysir" á spítölunum. Frekar mikið álag, en það eru bara 3 vikur eftir af því... sem er samt dálítið langt. Engar æfingar á meðan, sem er frekar fúlt. Og lítill tími til að læra.

Af öðru en skóla þá fórum við Bubba í sund um daginn og hún tók myndir af mér. Bubba er sem sagt að læra ljósmyndun hérna og ég var módelið hennar þann daginn. Ég er svolítið eins og lík á myndunum en þær eru mjög flottar finnst mér. Tékkið á bubbat.com ef þið viljið sjá...

Helgin framundan verður sennilega róleg hjá okkur Kela, ef maður á að ná einhverjum árangri í lestri þeas. Kannski 1-2 bjórar á föstudaginn í góðum selskap. En ég vona þið hafið það gott, hverjir sem að lesa þetta blogg ennþá :)

Sigrún

Bloggleysið hefur verið gríðarlegt síðustu vikurnar, og vil ég kenna facebook þar um, alveg ótrúlegt hvað svona vitleysa getur stolið mikið af tíma frá manni. En auk facebook höfum við bæði haft mikið að gera í skólanum og svo hefur líka verið mjög gestkvæmt upp á síðkastið sem er auðvitað bara hið besta mál. Mundi bróðir var hér í fimm daga í síðustu viku og Guðlaug og Þorsteinn litu einnig inn á svipuðum tíma. Þar að auki eru mamma og pabbi hérna í rannsóknarleyfi í tvær vikur og leigja mjög flotta íbúð á besta stað í miðborg Kaupmannhafnar, ekki amalegt það!

Annars er bara allt gott í fréttum og við höfum það mjög gott hérna úti. Íbúðin okkar hefur tekið stakkaskiptum, en við skelltum okkur í IKEA fyrir hálfum mánuði og fjárfestum meðal annars í sófa, hægindastól og skáp. Þannig við erum bara farin að vera nokkuð sátt við íbúðina, sem og hverfið okkar, Norðurbrú, sem við erum alltaf að kynnast betur og betur. Reyndar var hverfið aftur lagt í rúst um daginn af ungdomshus krökkunum, en við kipptum okkur ekki mikið upp við það enda er sú vitleysa nánast farin að vera mánaðalegur viðburður á þessum slóðum (enda hefur fasteingaverð fallið um 17 % á einu ári í hverfinu).

Fyrr í mánuðinum fjárfestum við svo í líkamsræktarkorti til að vinna á móti áhrifum ölsins á kroppahlutföllin, og höfum við verið nokkuð dugleg þar upp á síðkastið. Reyndar fer Sigrun yfirleitt ein, og ég fer með honum Dóra en við skokkum 5-6 km og lyftum svona þrisvar í viku auk þess sem við spilum fótbolta svona tvisvar í viku. Af fótboltaliðinu er það annars að fretta að við erum á toppi deildarinnar þegar að það eru þrír leikir eftir, þannig vonandi erum við á leiðinni upp í A-riðil á næsta ári. Reyndar er ég aðeins farinn að hugsa mér til hreyfingar þar sem að ég vil gjarnan æfa á aðeins hærra stigi og þá allavega oftar en einu sinni í viku.. Á móti kemur að félagsskapurinn í F.C. Rut er frábær og ég er alls ekkert viss um að ég tími að fórna honum... En þetta skýrist fljótlega. Í skólanum er að sama skapi kominn tími til að taka ákvörðun um hvað ég ætla að rannsaka í mastersverkefninu, og er það alls ekki auðveld ákvörðun enda eru möguleikarnir nánast endalausir. Námið sem ég er í er það virt í mínum bransa í Danmörku að það hreinlega rignir yfir okkur auglýsingum um lausar mastersstöður, sem er að sjálfsögðu jákvætt en það auðveldar ekki þessa ákvörðun... en þetta skýrist líka fljótlega... !!

Og talandi um námið mitt, þá var umfjöllun um það á forsíðu informationen í vikunni sem finna má hér: http://information.dk/146528

Stúlkan á myndinni þarna er hún Metta bekkjasystir mín, algjör toppmanneskja.

En þarna má lesa að mörgum finnst námið greinilega  vera allt of dýrt, og talað um að einungis fáir útvaldir ofurnámsmenn fái inngöngu á ári... Full dramatískt að mínu mati, og lýsingin á okkur sem einhverjum túrbó manneskjum er frekar hæpin. Samt gaman að heyra að litið er á námið sem eitthvað elítu-nám, en það hafði ég til dæmis ekki hugmynd um..!!

En ég er farinn að lesa, vona að það verði styttra milli skrifa í framtíðinni (Sigrun farðu að skrifa líka !!).

Við heyrumst, Keli

Heilir og sælir góðir lesendur, langt síðan ég skrifaði síðast en ég vona að þið séuð ekki búin að gefast upp á mér ennþá :) Nú er ég búinn að vera í Danmörku í eina og hálfa viku, eftir vel þegið og gott sumarfrí á Íslandi. Fríið var reyndar allt of stutt, ég náði að hitta um það bil einn þriðja af fólkinu sem ég ætlaði að hitta og gera örlítið brot af því sem ég ætlaði að gera. Auk þess veit ég allt of mikið um hundinn Lúkas (fólk er ekki í lagi!!), og finnst verðlagið á Íslandi brandari… en lítið við því að gera, Ísland er ennþá besta land í heimi og fríið var mjög skemmtilegt. Alveg frábært að hitta fjölskyldu og vini og ég sný endurnærður til baka til Köben, ekki spurning um það. Sigrún er reyndar ennþá á Íslandi, og verður út ágúst þar, þannig ég er sem stendur einn í kotinu.
    Í síðustu viku fór ég í rustur með skólanum. Fyrir þá sem ekki þekkja danska menntamálakerfið, þá er rustur nokkra daga ferð (stundum vika) eitthvað upp í sveit með öðrum í náminu með það að markmiði að bjóða nýnema velkomna. Til að gera langa sögu stutta þá snúast þessar ferðir um bjórdrykkju og alls konar fíflalæti og geta verið alveg þrælskemmtilegar (ef maður er fyrir svoleiðis). Ég skemmti mér afar vel að þessu sinni, og bauð fólki upp á brennivín sem vakti mikla lukku (þótt fólk hafi kvartað yfir hausverk daginn eftir ;)). Meðal nýnema að þessu sinni eru tveir Íslendingar, Arnaldur og Halla, og þó nokkrir aðrir útlendingar, þannig ég er ekki lengur eini útlendingurinn í human biologi (enda farið að kenna á ensku núna).
    Um helgina fékk hann Kristján (kærasti Völu, frænku Sigrúnar) að gista hja mer, þar sem hann var í húsnæðisvandræðum. Við skruppum aðeins a Tjilipop (barinn við hliðinná) en vorum annars frekar rólegir. Á laugardeginum skellti ég mér svo út á lífið með Ísaki og tveimur vinum hans en notaði helgina annars í að safna kröftum eftir ferðina. Síðasta mánudag byrjaði svo skólinn. Reyndar er ég ekki í týpískri kennslu núna, heldur er ég á ríkisspítalanum (í hvítum læknaslopp nota bene) að fylgjast með störfum lækna sem er afar áhugavert. Markmiðið með því er samkvæmt læknunum að gefa okkur tækifæri til að sjá veika sjúklinga og sýna að þær rannsóknir sem við komum til með að gera, geti skipt sköpun í meðferð og vellíðan sjúklinga. Hljómar klisjukennt en svínvirkar enga að síður auk þess sem að hvíti sloppurinn fer mér bara nokkuð vel :) .
            Núna eru svo helgin loksins gengin í garð, ég búinn að þrífa íbúðina og þvo skítugu fötin og er núna á leiðinni út að borða með honum Arnaldi. Reyndar hefur veðrið aðeins dalað, búið að vera glaðsólskin og 25 graður alla vikuna, en skýjað í dag… týpískt. Eftir helgi koma svo Palli og Klemenz í heimsókn, og verður það án vafa mjög skemmtilegur félagsskapur. Ég ætla að enda þessu færslu með mynd sem hann Frederik vinur minn tók af okkur í rusturnum, þema dagsins var jungle…


og svo ein af gríska vini okkar, sem var mjög hrifinn af brennivíni:



Blessbless

Keli

Nú er ég loksins komin í sumarfrí og nýt lífsins. Síðan ég kom úr prófinu á miðvikudaginn hef ég:

-drukkið bjór á Tjili Pop
-drukkið bjór á Studenterklubben
-farið á trúnó með svíum og dönum
-reykt vatnspípu
-verið vitni við brúðkaup Helga og Pernille
-borðað síld og dillkartöflur
-farið í skánskt midsommar partí
-sungið á sænsku og dansað í kringum frjósemistákn
-nattbadat
-gist með þremur vinkonum í einu rúmi (og sofið illa)
-synt í köldum sjó með bróður mínum
-sólbrunnið á bakinu
-verslað
-borðað nýplokkuð jarðaber

Lífið er yndislegt á sumrin. Annað kvöld kem ég heim á Frónið. Hvað ætli bætist á listann þar?
Hlakka til að sjá ykkur!

Ég, Þorkell Guðjónsson, auglýsi hér með eftir einhverjum sem hefur áhuga á að fara á Smashing Pumpkins, hér í Kaupmannahöfn þann 14.ágúst.

http://www.youtube.com/watch?v=wY8hPan6uuM

Mig langar mikið til að sjá þetta band, en nenni engan veginn að fara einn. Frí gisting og leiðsögn um götur Kaupmannahafnar í boði. Áhugasamir hafi samband sem fyrst :)

Svo lofa ég meira bloggi þegar ég er kominn í sumarfrí (vika í það), en þangað til er það hardcore lærdómur, og svo Ísland þann 29.júní (kem með almennilegt veður með mér). Sigrún fer í sitt próf á morgun, og er óhætt að segja að hún hafi verið öflug í lærdómnum, þannig ég á ekki von á öðru en hún standist prófið með sóma. Hún fær svo nokkra daga í frí, en næsta sunnudag fer hún til Íslands.

Vona að fólk sé að njóta sumarsins á Íslandi. Hafið það gott.

kveðja Þorkell Guðjónsson